Festival Sinsal Logo

Pere Ubu

{{6 de decembro 2014}} | 23.30h _ Sala Master _ Bono: 20/25€ _ Entrada única: 13/15€

Pere Ubu é un dos mellores exemplos de integridade artística que deu a historia do rock. Fundados en 1975, e coa figura reverencial de David Thomas como faro e única constante, os de Cleveland déixano claro dende o lema que preside a súa enciclopédica web: Ars longa,spectatores fugaces (a arte perdura, o público vén e vai).

Toda unha declaración de intencións que vén rexendo a súa monumental carreira, e que explica a falta de prexuízos dun discurso que, aínda que aceptaría infinitas etiquetas, podemos resumir como art punk rock ou, de xeito máis xusto, rock á Pere Ubu.

Ese perfil de outsiders natos privounos do éxito comercial, ao tempo que lles granxeaba un papel de culto que fai enmudecer o doutras divindades underground coetáneas como Swans, The Residents, RedeKrayola (o propio Mayo Thompson formou parte de Pere Ubu), ouFaust. Consciente ou inconscientemente influíron á plana maior do rock internacional, e entre os seus seguidores confesos encontrámonos, por poñer uns exemplos, a Joy Division, Pixies,Husker Du, Henry Rollins, REM, Sisters of Mercy, Thomas Dolby,Bauhaus, ou Julian Cope. Aí é nada.

Aínda que os seus directos son coñecidos pola súa demoledora intensidade, David Thomas e os seus non se prodigaron nos nosos escenarios, e a súa visita ao noso país con motivo da presentación de "Carnival of Souls" (Fire, 2014),un décimo oitavo disco de estudo que ten como data de publicación o próximo mes de setembro, prevese como unha cita histórica. Marquen en vermello os seus calendarios.

MERCAR ENTRADAS